Nos E Prumeru i non Sugundu
E pamodi odju di mundu sta na nos
ki oxi nu sta kaminha ku tenasidadi
ka skravu mas fidju nobu di liberdadi
kada dia ta kauza spantu ta fla ma nos
e universal sen riseiu mas nes idadi
ta da pasada serenu dianti di okazion
ta obi gritu di mundu «avanti tubaron»
ki dja sakudi povu i dja labanta sidadi
e purisu ki nos te ra dja kubri di bon gritu
ki barku na mar i na portu dja ratxa pitu
ki inkredulidadi ta fase es fetu bira mitu
mas pa nos tantu ozadia bira sinplis ritu
ki ta simia bon perplekisidadi tudu tenpu
ta nega tudu faita frakeza o so asimetria
mas ta fla ‘pa txiga gulo ria tudu dia e dia’
i tal noba beniginu el ta spadja na bentu
es arbisa ta suplanta tudu oror di pasadu
kantu faita nu kaneka d’agu o pratu midju
mas ku forsa ine ditu nu fase gulo ria fidju
pamodi dja tenpu ki nos distinu sinaladu
i tratandu di un kontisimentu ton tamanhu
so nos ki ka ta spanta ka ta atxa l stranhu
pamo nhu naxu ku nhu puxim dja naraba
ma ali ben tenpu ki tudu frakeza ta kababa
i tal ta pirmanese na boka di tudu mundu
ta spadja sima stribilin di djatu pa universu
i nos pueta balenti i brabu ta rikria l na versu
ta fla nos e tubaron nos e prumeru non sugundu
JOSÉ LUIZ TAVARES
